اليوم الرابع : الثلاثاء
التاريخ : ١٤٣٦/١٢/٨
المكان : قاعة البشائر للأفراح - مكة المكرمة
بدأ يومنا صباح الساعه ٧ قمت على صوت المشهور علشان نروح للحرم و نعتمر قمت مستعجل و صليت و افطرت جاني قال وش رايك نخليها الظهر 🔥☀️ قلت ي ولد حنا نبي نعتمر ما يصير كذا خلنا نخلص طبعا قفلت معي 😤. بعد ما صارت الساعه ٢ قال ولد خله على العصر طبعا هنا استسلمت للامر الواقع قلت وشرايك نخدم الحجاج والسنه الجاية نحج < يالحبيب حنا جايين نحج 😒> . في تمام الساعه ٣ عصرا ، احرمنا ولبينا للعمره و الحج وانا كنت متمتع بعد ما لبست الاحرام قلت < لبيك اللهم عمره متمتع بها الى الحج 🙏🏻 >. طلعنا من القاعه مع تكسي 🚕 وكان معنا شخص من الحملة كان مقرن و نوى الى متمتع و يوم ركبنا انا و المشهور والرجال كان قدامنا طلع دفع الحساب وقال الرجال انه ب٥٠ ريال .
وصلنا للحرم في تمام الساعه ٤ مساءا. بدينا بالطواف ٧ اشواط وكان الحجاج في الطواف قليل وراحة واخذناها ب ٢٧ دقيقة صح ان الوقت موب مهم لكن يعني اذكر لكم بان الحرم كان فاضي .
بعد الانتهاء من الطواف رحنا للمكان فاضي و يكون قريب من المقام علشان ركعتين بعد الطواف
تقرا في بدايتها سورة الكافرون و الثانية سورة الأخلاص.
وبعدها رحنا للمسعى ( الصفا و المروه ) اتفقنا ننزل القبو الي فيه المسعى بما انه الحجاج قليل فيه بدينا بالصفا وذكرنا الادعية وانتهينا عند المروه
٧ اشواط ذهابا وايابا 🚶🏻 ( الصفا ٤ و المروه ٣ ).
طبعا اذا وصلت اللمبة الخضرا تبدا هروله او الركض 🏃🏻. بعد الانتهاء من العمره بقى علينا التقصير علشان نحلل من الاحرام و نستعد للحج غدا . حلقنا كلنا تخفيف علشان بعد الحج بالموس 😅. بعد ما انتهينا من مناسك العمره طلعنا لتكسي نحمد لله العمره كانت خفيف وسهله علينا مشينا للتكسي و يعطيه العافية عز الله انه وقف بعيد دقيناها رجليه 🚶🏻والمشهور مسكت معه الا نرجع معه علشانه ب٥٠ الاخ يحسبنها على المشوار طلع ع كل شخص ٥٠ 😁😂. وحلف علينا قبل ما نركب انه محد يدفع ( و الله المسكين أكلها دايم الواحد لا يستعجل اسال اول ) في طريقنا للتكسي عجبتني هذه اللقطة و صورتها عطوني رايكم 😎.
الزبده نرجع لمحور حديثنا وحنا رايحين للتكسي اشوف خوينا يلحقنا ويقول يالربع تعالو فيه تكسي ب ٣٠ بس المشهور مسكت معه الا يرجع مع الاول ويقول لو اعطيه ١٠٠ انا كلمته خلاص . ( اجل ١٠٠ لو انك تدري انها ع الشخص كان دقيتها رجلية للسكن 😂).
طبعا انا ذكرت فوق ان حنا خلصنا مناسك العمره انا صادق بس باقي التقصير قال لنا التكسي بو ٥٠ خويي المشهور لا تحلقون تعال لان العسكر بيطرودني فتعالو بسرعه بوديكم حلاق على الطريق
مشوارنا الي مشيناه علشان نقابل التكسي مسافة ٤٠٠ متر ما تسوى 😔. ركبنا اخيرا مع التكسي 😓 ووصلنا عند حلاق ونزلنا ثلاثتنا وقال لنا التكسي اذا جاتني الدورية بوقف قدام المهم نزلنا وحلقنا وخلصنا على اذان المغرب خوينا الي معنا اسمه عبدالله الغواص ويوم طلع يقول يولد ما حصلت التكسي قلت له يقول بتحصلوني قدام قال ي رجال يكذب قلت انت رحت قال لا 😒 قلت زينا مشينا بنحصله ان شاء الله. قال ي رجال خويك هادي قد دفع له الحساب اكيد سحب علينا وانا للحين ماسكه معي بعد على ان السعر ب ٥٠ بس
قلت من جدك يروح علشان ٥٠ بس ما تسوى. طبعا عبدالله للحين ما علمني انها على الشخص الواحد يعني حنا ٣ ب (١٥٠) 😅 مشوار ١٠ دقايق هذي لعبتهم التكاسي يستغلون الحجاج لكن الله كريم . على كل حال رجعنا للقاعة تقريبا على الساعه ٧ مساءا .
واول ما رجعت قالو لي اطبع الاوراق وعلقها علشان بكره الباصات 🚌 علشان كل شخص يعرف رقم باصه وبكره يوم عرفة ( ي رب عفوك 👐🏼).
و فعلا يوم وصلت من الحرم تروشت و لبست بدلتي و رحت اطبع الاوراق طبعا الي ضبطتها. لاني جهزت الي قبل و علقتها وطلع فيها تعديلات زعل علي راشد يقول فيه ناس ما ضفتهم وكذا قلت خير ان شاء الله. قلت خلاص انت جهزها وانا بعلقها لك و فعل علقناها و قامو الحجاج الي معنا بالحملة كل شخص يتاكد من اسمه وكذا و طلع فيه ناس واجد ما حصلو اسماءهم. ورحت للاخ راشد وقلت له: هاه وين التعديل وانت مغير تحط اللوم علي قال ي رجال ذولا ما يدورن قلت ع كل حال خلنا نضيفهم بطريقة سهله وسريعه اخذنا الاسماء للمره الثالثة وعدلنا عليها ويوم رقدو اغلبية الحجاج علقناها علشان اذا جاء صبح يوم عرفة يتأكدون قبل لا يركبون 🚌.
وانتهى يوم الثلاثاء هذا الي قدرت اذكره بكره باذن الله اكمل لكم. نراكم على خير 👌🏻😎
ليست هناك تعليقات:
إرسال تعليق