اليوم الخامس : الأربعاء
التاريخ :١٤٣٦/١٢/٩
المكان : قاعة البشائر للأفراح - مكة المكرمة
بدأ يومنا كبداية الايام الي قبل صباح فطور و كل شخص في حاله . وانا والي معي بدايتنا المكتب طبعا اكيد الصلاه اهم شي واول شيء بس انا اكتب لكم الاشياء الي جديده في رحلتنا ولا الصلاه نحمدلله ما ننساها. على كل حال اصبحنا على ذكر الله
( سبحانه ) وبعد ذكره رحنا نتاكد من الباصات والي عدل اسمه ولا نقل اسمه طبعا في مشرفين حاطينهم عند لوحة الاعلانات الي ما يحصل اسمه يسجله ويعطينا اياها الي هم ( راكان و هادي بن علي السريع ) طبعا الساعه ١٠ تحرك الباصات 🚌 لازم نجي عرفة قبل اذان الظهر ☀️ .
صار فيه اكشن في تمام الساعه ٨ صباح جاني هادي بن علي السريع يشتكي من واحد يقول ي ولد فيه واحد يقول انه ما حصل اسمه ولا اسم اهله ويطول صوته. قالي تعال تفاهم معه ولا فهمه سالته قلت ي رب ما هول شايب ( طبعا لاتلؤمني لان لي سوابق مع التفاهم مع الشيبان ودايم اكلها ) يوم قال لا بالله شباب قلت افضل يمدي اتفاهم معه اول م دخلت القاعه الي فيه الاجتماع و البوفيه و الغدا والعشاء قاعه كبيره وفيها لوحة الاعلانات الي الرجال قاعد في الزاوية واشر عليه هادي جيت ( السلام عليكم يالله حيه حصلت اسمك انا جايه بهدوء ما ابي اشحنه لانه اصلا ضجر ومشحون 😡⚡️🔥 الرجال مولع مره قلت الله يستر منه لا يمد يده ولا يتكلم علي طبعا ماهوب خوف 😅 بس بما اني مع المشرفين ونمثل حملة اللواء الافضل تكون متعاون وتقبل اي شيء لانهم حجاج ودافعين فلوس فلازم نكون بخدمتهم .
على كل حال نرجع اقول لكم وش صار معهم قلت عطني اسماءكم قال ماهوب لازم قلت بدور للاسماء قال تراني متخرج ثانوي واعرف اقرا شفت الرجال مره قلت ي ولد ترا الاسماء حقت الباصات 🚌 نعلقها عليها ( انا قلتها ابي ابرد خاطره علشان يرتاح لان بعضهم يحسبنها حقت تصاريح ) . قال لا و الله باصات 🚌 ليه ماهيب صواريخ 🚀 محد فقع جبهت احد حاولت اهدي فيه شفت الرجال ناشف قلت نفداك بضيفهم الحين عطني اسماءهم قال ليته واحد ولا ٢ . ثمانية اسماء ما ضفتوهم هنا انا صراحه زقت في جويي لان راشد الي ضايفهم و راشد الله يهداه اذا قده يشتغل كانه المصاريه بتاع كلوه ماسك الاشراف و الباصات و الغدا و العشاء و الاسماء قلت ي راشد وزع المهام علشان يضبط الشغل قال لي لا الاسماء عندي انا اعرف اوزعهم . هاه الحين اقعد بها. على كل حال سحبت الصبي معي للغرفة وضفت اسماءهم وقام يتأسف مني قلت ي رجال من حقك تزعل. سألني عن اسمي يوم علمته قال تعرف متعب بن هادي اللواء قلت اي بالله ولد عمي احسبنه يبي يمدح شيء قال خلني ارجع و الله ان اعلمه ( طبعا ما يهدد يقصد يعاتبه ). لان الاخ متعب موصيه على حملة اللواء و الحملة ما عليها كلام بس شكلها ذي السنه صدفت المشاكل الباصات ما طلعت و التصاريح واسماء اهله ما ضفناهم تجمعت وانفجر الرجال ما ألومه بصراحه . على كل حال تيسرت الامور ووزعنا الاسماء وطبعناها.
انا باص رقم ٣ اغلبيتهم عيال اللواء 😁 بس معنا عيال بو شنب الصغار الله يصلحهم صح انهم مزعجين بس و الله يشتغلون و يكرفون بيض الله وجيهم. ركبنا الباصات 🚌
مشينا في تمام الساعه ١١ الى عرفات
الشخص هذا كوميدي و اخلاق وقلت له اجلس جنبي . والله انه يدخل القلب على كل حال اول ما وصلنا للعرفات اخذنا اغراضنا ومشينا مشي تقريبا ٣٠٠ متر صح انه حر لكن نحتسب للاجر ولله الحمد والمظلات معنا و المتطوعين والناس الي فيهم خير يوزعون الماء البارد على الطريق ببلاش جزاهم الله خير وجعلها الله في ميزان حسناتهم .
وصلنا لمكانا بعرفة لكن للاسف كان الوصول للخيمة صعب لكن سوينا طريق علشان يسهل لنا الطريق للخيمة و الطريق كان فيه نزله خطر وخفنا على الشيبان و العجايز فتساعدو الشباب جزاهم الله خير و ما قصرو .
وصلنا للمكان ولله الحمد ولا فيه اي مشكلة تساعدو الشباب في توسيع الخيام و توفير الماء البارد و المشروبات و الوجبات الخفيفة و الجو كان حار ☀️
لكن كان فيه اجهزه تهويه لتبريد المكان ( الي تعبيها ماء و تشغل التهويه وتبرد المكان ) . و ما قصرو اهل الاختراعات يجيبون الماء البارد و يفتحون فتحه صغيره من فوق العلبه و يرشون على الحجاج يبردون عليهم جزاهم الله خير.
وبعد ما جلسو الحجاج وبردو على نفسهم حدث علينا الشيخ : عبدالهادي بن ناصر وتكلم عن الحج و عرفات و ذّكرنا بالله جزاه الله خيرا . جلسنا من الساعه ١١ ظهرا الى الساعه ٦ هذي من مناسك الحج تكون بعرفة من شروق الشمس 🌞الى غروبها 🌝. بعد ما خلص الشيخ كلمته كل شخص وبراحته الي يتعبد والي ينام والافضل تستقل يوم عرفك بالتعبد و التقرب الى الله.
بعد ما قرب وقت الغروب قال الشيخ ابو عبدالرحمن للحجاج استعدوا علشان الزحمه واخذو اغراضكم طبعا معنا اللوحة حقت الحملة علشان يعرفون الحجاج الي معنا في الحملة وين مكان تجمعنا المهم تجهزنا و بدينا نشل الاغراض.
وجاء وقت الاستعداد للخروج من عرفات و المكان كان زحمة وانا طالع وقف السير و العالم يذكرون الله الافضل انك تطلع على الغروب ويوم قرب وقت الغروب وفتحوا الباب حسبت الحجاج متفهمين و الطريق سهل. نشبت في زحمة لا يعلم فيه الا الله
بدأ التدافع و الاصوات ترافع ( حج ي حاج ) و المصاريه ( الله اكبر الله اكبر ) علقت في زحمه و دخلت باللي يسموونه بالموج 🎽 وكلت امري لله وتشهدت وصراحه قمت افكر بالعوايل الي معنا وش صار بهم ولا وش علومهم لاني لحالي ما بغيت اطلع من الزحمه اول ما طلعت طاحت احد حذياي
( أكرمكم الله ) ولقيت وحده لبستها علشان الشارع
و الممشى.
صح ان النعال ( اكرمكم الله ) ما هي تشابه لكن اهم شيء امشي نفسي. طلع ادور حملتنا و اخويانا تقريبا نصف ساعه ما حصلت احد و اخير حصلت اللوحة ( الحمدلله ) بيض الله وجيههم على الفكرة . بعد ما حصلت اخوياي رحت لهم وانا و الله مانيب بخير جاني ضيق تنفس و نجاة من الزحمه 😓.
( عسى ربي يكتب اجر تعبنا ) المهم يوم قابلتهم كملنا طريقنا انا واحد من الحجاج ( ما اعرف اسمه ) اهم شيء انه معنا في الحملة وحنا راجعين اسمع صوت شخص يصيح 😦 ويلحق راعي شاحنة صغيره الا الي يدعي ابو شنب يبي يوقف الشاحنة و نوقف انا وخويي الي معي ( الي ما اعرف اسمه ) بصراحة قلنا اكيد انه دعس احد الا يوم جينا الا راعي الشاحنة واقفه يوم وصلنا ورا الشاحنة نبي نشوف وش المشكلة الا ذا ( راشد ولد ابو شنب ) الله يهداه ملقوف الشاحنة تمشي و الاخ يبي يركب معها ونقز يبي يتمسك بعروة الباب الي ورا و تزلق يده و يطيح . صح انه ملقوف لكن اهل المواتر ذولا يحسبون نفسهم على شارع عام . يجيكم الواحد يمشي طبلونه .
على كل حال وحنا في طريقنا انا وخويي ( الي ما اعرف اسمه ) اخذنا لنا بارد ايسكريم و ماء نبي بارد ما حصلنا الا حار اهم شيء ماء يوم جينا نبي ندفع الحساب الا فيه واحد ورانا يقول مدفوع الحساب خلاص روحو ، سالني خويي الي معي يقول تعرفه قلت لا و الله . المهم هو حلف علينا يبي اجر الحجاج طلع الشخص يتصدق على الحجاج عسى ربي ييسر له امره ويرزقنا وياه بالجنه 👐🏼.
تشوفون ظل خويي الي معي ( الي ما اعرف اسمه ). الحمد لله وصلنا الباصات وانا ماني بطيب يوم قابلت الحجاج الي معنا في الحملة استانست و سالت خوالي منصور + فهد وين اهلكم اخباركم و صار معهم بس طلعت الامور سهلات نحمدلله .
بعد ما خلصنا من عرفات توجهنا الى مزدلفة في تمام الساعه ٩ مساءا.
بعد ما ضبطنا الفرش للحجاج و رتبنا المكان وجلسو الحجاج الي معنا.
رحنا للشاحنة صغيره ( دنا ) يوزعون الماء ورز ولحم ببلاش جزاهم الله خير و يكتب اجرهم.
وبعده العشاء اجتمعنا و كل قروب في له مكان و فيه ناس جمعو حصى علشان الجمرات و كل شخص يجمع ٤٩ حصاه . في ١٠ من ذي الحجة ترمي ٧ جمرات و تاريخ ١١ ترمي ٢١ تبدا من الجمارات الصغرى و وبعدها الوسطى و في الاخير الكبرى كل شوط ٧ جمرات . المهم انا استعجلت في الشرح لكن نرجع لحديثنا رحنا نجمع الحصى علشان نستعد لبكره و كان الاخ ناصر الي يتاكد من الحصى عز الله رجعنا واجد . الحصى تكون بين حبة الفول و الحمص وبعضهم يجيب حبة وش كبرها لكن نرجع نتاكد من ناصر بن سفر المهم انه رفع ضغطي جبت ما يقارب ١٠٠ يقول كلها كبيره وصغيره مره . وكان فيه شيخ جنبي طلع لي من ١٠٠ حصى كثير وقلت بيض الله وجهك .
هنا الاخ فهد يعد الحصى بطريقة عجيبه .
بعد ما وصلت الساعه ١١ ونصف مساءا. توجهنا للباصات مشي 😕🚶🏻. مشينا تقريبا ٣ او ٤ كيلو نحمدلله صح انه تعب لكن باذن الله اجر . على كل حال يوم قربنا من الباصات حصلنا الجمعية ( هدي + فدي ) انا دفعت كلها هدي و فدي. الفدي لاني احرمت من مكة و الهدي علشاني متمتع بالحج .
بعد ما وصلت الباصات ركبنا و توجهنا للحرم.
( شرفها الله ) علشان نطوف طواف الافاظة و نسعى بالصفا و المروه . تحركو كل الحجاج الي معنا وانا كنت وراهم مريت اقرب مطعم و الله اني جويع 😩 . اخذت لي شاورما صاج طعمها لذيذ بصراحة مدري يمكن علشاني جويع طبعا من دون بارد يعني ناشف بس معليه تحمل . ما عنده الا عصائر طازجة ولازم يسويها يعني يبي له ١٠ دقايق وانا ابي الحق الربع 🏃🏻💨.
وصلنا الحرم وطفنا ٧ اشواط في الدور الثاني و التنظيم كان رائع والله يكتب اجرهم على التعب خاصة المنتدبين وجزا الله ال سعود خيرا الجزاء على التوسعه جعلها الله بميزان حسناتهم .
على كل حال بعد ما انتهينا من الطواف و السعي رحنا نحلق كلنا موس انا طبعا متعود لاني شعري جذاب 😅. بس بكل صراحة كنت اتمنى خالي فهد يحلق لاني ما قد شفته بالموس اتخيل شكله 😂💭.
و في نهاية يوم الاربعاء بعد ( عرفة + مزدلفة + الجمرات + طواف الافاضة و السعي ) الحمدلله
ورجعنا على الصبح و الواحد يالله انه يمشي واخيرا حصلت فراشي و مكاني 😮😴.
ليست هناك تعليقات:
إرسال تعليق